Жарқайың ауданында көктемгі дала жұмыстары толық көлемде аяқталып, мал шаруашылығы саласында тұрақты өсім сақталуда. Бұл туралы ауданның әлеуметтік-экономикалық даму қорытындыларына арналған брифинг барысында аудан әкімі Ербол Жүсіпбеков мәлімдеді.
Биылғы егіс науқаны жоспарға сәйкес жүзеге асырылып, жүздеген мың гектар алқапқа ауыл шаруашылығы дақылдары егілді. Дәстүрлі түрде негізгі егіс алқаптарын дәнді және бұршақты дақылдар құрағанымен, шаруалар егіс құрылымын әртараптандыруға ерекше көңіл бөліп, майлы және мал азықтық дақылдардың көлемін ұлғайтуда. Мемлекеттік қолдау шараларының арқасында ауыл шаруашылығы тауарын өндірушілер жеңілдетілген қаржыландыруға қол жеткізіп, көктемгі жұмыстарды уақытылы жүргізу үшін арзандатылған дизель отынымен толық қамтамасыз етілді.
Ауданда мал шаруашылығы да қарқынды дамып келеді. Ірі қара мал саны 14 пайызға өссе, сиыр басы 20 пайыздан астам артқан. Мал басының көбеюі мен өнімділіктің жоғарылауы нәтижесінде ет, сүт және жұмыртқа өндірісінің көлемі едәуір ұлғайып, өңірдің азық-түлік қауіпсіздігін қамтамасыз етуге оң әсерін тигізуде.
Сонымен қатар, ауданда пайдаланылмай жатқан ауыл шаруашылығы жерлерін мемлекет меншігіне қайтару жұмыстары белсенді жүргізілуде. Бұл жайылымдық жерлерді жергілікті тұрғындардың игілігіне пайдалануға мүмкіндік береді.
Ауыл шаруашылығы аудан экономикасының негізгі тірегі болып қала береді. Диқандардың үйлесімді еңбегі мен мемлекеттік қолдаудың арқасында көктемгі егіс жұмыстары ұйымдасқан түрде өтті. Ал мал басының көбеюі сапалы мал шаруашылығы өнімдерін өндіру көлемін арттыруға жаңа мүмкіндіктер ашып отыр
– деді Ербол Жүсіпбеков.
Жер ресурстарын тиімді пайдалану, аграрлық секторды техникалық жаңғырту және мемлекеттік қолдау шараларын ұтымды жүзеге асыру Жарқайың ауданының агроөнеркәсіп кешенінің тұрақты дамуына негіз болып, оның өңірдегі жетекші ауыл шаруашылығы аудандарының бірі ретіндегі позициясын нығайта түсуде.